Dr Ben und dr Gian sueche dr Samichlaus

Wo isch dr Samichlaus

Dr Ben und dr Gian heis chuum chönne erwarte. Es isch dr 6. Dezämber und Samichlaus Daag. Si warte ganz gspannt uf em Sofa uf dr alti Maa mitem wisse Bart. Es wird 7ni, 8i, 9i … abr dr Samichlaus chunnt nit.

Ganz enttüscht nämme si s’Telefon und wähle d’Nummere vom Christchindli. Leider weiss s’Christchindli o nit wo är steckt und macht sich ä chli Sorge. S’Christchindli fliegt grad los und verspricht dä zwoi Jungs, dass si sich zämme am nächschte Daag uf d Suechi mache.

Am Morge frieh isch s’Christchindli wie versproche vor dr Tür. Die drei si sich grad einig: «Mir miesse i Schwarzwald nachem Samichlaus go luege». Also schnappe si sich d’Vespa (mi nennt se o dr roti Ferrari) und fahre ufem schnällschte Wäg zum Dähei vom Samichlaus.

Im Schwarzwald bim Samichlaus dähei

Ändlich im Schwarzwald und bi sinere Hütte acho, sueche si alles ab. Si finge aber kei Samichlaus, drfüür ä Blatt Papier mit ere Nachricht druf. Dr Ben und dr Gian si sich nit einig wär se zerscht dörf aluege und läse. Während die zwoi Buebe strite, schnappt sich s’Christchindli s’Papier und list d’Nachricht lut vor: «D’Mensche wüsse eifach nit was wichtig isch im Läbe. I glaub i bruch e Uszit!»

«Was meinet dir, was dr Samichlaus mit däm gmeint het?» frogt s’Christchindli dr Ben und dr Gian. Die bede luege sich a und säge glichzitig: «Dr Samichlaus het sicher gmeint, dass vill wäge Chabis gstritte wird.» Do muess s’Chrischtchindli schmunzle und seit: «Do heit dir rächt, das isch ganz sicher ei Grund wieso dr Samichlaus ab isch. Nämmet das mit und packets i euche Rucksack»

«Mir miesse dr Samichlaus finge und em säge, dass mir eus Mieä gäbe und nümm e so vill wei strite.» seit dr Gian. Do frogt dr Ben: «Aber wo chönnt är ane si?» I däm Momänt finde si ä Foti vomene Elefant und e Giraff ufem Tisch. Do isch allne klar – dr Samichlaus isch uf Afrika. Also mache si sich mit dr Vespa und dr Fähri uf e Wäg i Süde.

Afrika

Nachere ufregendä Fahrt chömme si imene kenjanische Dorf a. Dört erläbe si wie alli Lüt im Dorf ä risigs Fescht zämme fiire. D’Bewohner si ganz interessiert und bestune dr roti Flitzer wo d’Jungs für d’Reis brucht hei. D’Chinge vom Dorf lade dr Ben und dr Gian i zum mittanze und hei ä riise Freud.

Nacheme Wiili frogt s’Chrischtchindli öb öbber vom Dorf dr Samichlaus atroffe het. Es afrikanischs Meitli frogt noche öb das dr Maa mit emene wisse lange Bart chönnt si, wo letschti Wuche uf Bsuech gsi isch. Alli drei säge sofort: «Jo genau – dä sueche mir.» S’Meitli verzellt, dass dr Samichlaus o bi ine im Dorf gsi isch und genau so mitgfeschtet het. Är sig so fasziniert gsi wies s’Dorf mit so wenig Gäld und Sache so glücklich cha si.

S’Christchindli freut sich über das was si do vom Meitli ghört het und frogt dr Ben und dr Gian: «Und was meinet dir, was het dr Samichlaus i däm Dorf gfunge?» Die bede Jungs studiere ä biz. Denn springt dr Gian uf und seit ufgregt: «Wenn me weniger het, merkt me besser was wichtig isch». Dr Ben nickt und meint: «Jo genau, me muess guet uf d Familie und Fründe luege und änanger hälfe».

«Cool, das heit dir super usegfunge! Packet was dr glehrt heit i euche Rucksack. Jetz miesse mir aber witr und dr Samichlaus finge», meint s’Christchindli. Ä Bueb usem Dorf cha witer hälfe. Dr Samichlaus het ihm gseit är wot die längschti Muur go aluege. «China, China die isch in China. Das weiss i vo dr Schuel», rieft dr Ben. Well s Dorf e sone Freud a dr Vespa het, lö si se lo stoh und hole se ufem Heiwäg ab.

Asie

Mit em Flieger chöme die drei ganz gspannt im grosse China a. Emene chinesische Bueb verzelle si vo ihrem Abentür und bechömme drfür es Tandem Velo, das isch es Velo mit 2 Sitz. Mit däm fahre si über Stock und Stei – s’Chrischtchindli fliegt vorus. Wo si durene Bambuswald fahre, träffe si ufene Gruppe Pandabäre wo gnüsslich am Bambus knabbere si.

Dr Gian rieft de Bäre zue: «Hallo zämme, heit dir dr Samichlaus gseh? Ä alte Maa mitemene lange wisse Bart?» Schmatzend seit e Pandabär: «Klar hei mir dä gseh. Är isch bi eus ghockt, het schtundelang zuegluegt wie die ältere vo eusere Gruppe dr Bambus parat gmacht hei und mir denn zämme knabberet hei.» Denn chunnt dr chli Pandabär z’gumpe und verzellt lachend: «I han em o e Stückli gä. Denn het ärs probiert und dri bisse und fascht e Zahn verlore.» Dr Samichlaus heig denn gseit, dass Bambus nit a sis Lieblingsässe – Röschti mit Spiegelei – anechunnt.

Vo dr Vorschtellig wie dr Samichlaus amene Bambus knabberet het, hei sich die drei chum chönne erhole. Denn het sich s’Chrischtchindli zum Gian und em Ben umdreit und gfrogt: «Und was meinet dir, was het dr Samichlaus do bi dene Pandas gfunge?» Die bede studiere e churze Momänt bis si sich sicher si was es isch. «Dr Samichlaus het’s gfreut wie d’Bäre s’Ässe teilt hei», seit dr Ben und dr Gian meint: «Jo genau, si luege ufenanger und luege, dass alli öbbis hei.»

«Super, heit dir das usegfunge!», seit s’Christchindli. D’Bäre klatsche i d’Pfote, schmatze und schmunzle. «Vor e paar Daag isch är widr abgreist. Är het gmeint är wot ändlich ämol ä Känguru gseh», seit eine vo de Bäre.

Si packe s’Teile i ihre Rucksack i und verabschiide sich.

Auschtralie

Nachere aschträngende Reis mit em Tandem-Velo, em Zug und am Schluss mit em Schiff chömme s’Christchindli, dr Ben und dr Gian in Auschtralie a. Nachere längere Fahrt mit em Velo chömme si zunere Kängurufamilie. E chlises Känguru luegt usem Bütel vo dr Mueter use und frogt gwungrig: «Hallo luschtigs Reisegrüppli. Dir gseht us als währed dir uf dr Suechi nach öbbis.» S’Chrischtchindli antwortet: «Jo genau chline Gumper. Mir sueche dr Samichlaus. Hesch en du gseh?»

«Dr Samichlaus isch bi eus uf Bsuech gsi und mir hei lang mitenanger gschwätzt. Är het gseit är sig ä chli nidisch, dass är nit so hoch cha gumpe wie mir.» S’chline Känguru het no e huffe Gschichte verzellt bis es seit, dass dr Samichlaus ganz i dr Nöchi im Meer het wölle go surfe.

Nachdäm si sich bedankt hei gö si witr as Meer. Dört träffe si ufne jungs Meitli wo am Strand sitzt. S’Meitli verzellt wie dr Samichlaus genau do gsässe isch und schtundelang zuegluegt het wie si gsurft het. Denn het ärs sälber gwagt und isch mit ihre go surfe. «Es het em risige Spass gmacht», verzellt s’Meitli.

«Z’Nacht am Lagerfüür han i em Samichlaus mi Traum vrzellt, wie i a dr australische Surf-Meischterschaft wöt mitmache. I träum drvo dört ufem Podescht zstoh», seit s’Meitli witr. Dr Samichlaus het sich a däm Obe bim Meitli bedankt und het ihre gseit, dass es ganz wichtig isch fescht a ihri Träum z’glaube. Am nächschte Daag isch är abgreist.

«Aha, träume muess me. Das isch das wo dr Samichlaus in Auschtralie usegfunge het.», lacht dr Ben. S’Chrischtchindli lost schmunzelnd zue und seit drzue: «Mir miesse alli träume, es Ziel vor Auge ha und uf eus stolz si, wenn mir öbbis neus erreicht hei.» Also packe si s’Träume i ihre Rucksack i.

Vom Surfermeitli hei si erfahre, dass dr Samichlaus uf Argentinie witer greist isch. Dört het är wölle luege wie d’Chinge Fuessball spile.

Südamerika

S’Ziel isch klar – ab nach Argentinie. Im Hafe hei si ä Segelschiff gfunge, wo nach Südamerika losfahrt und die drei mitnimmt. Dr Wing meints guet und bringt se schnuerstracks a die argentinischi Küschte.

Vo dört us zieht dr Gian, dr Ben und s’Chrischtchindli witr is Landesinnere. Si chömme a wunderschöne Stedtli und Dörfli vorbi bis si vo dr Stross us e Fuessballfäld entdecke. Si gseh wie dört Jungs und Meitli mit vollem Elan und Freud zämme Fuessball spile. S’Chrischtchindli schlot vor, d’Chinge go froge öb dr Samichlaus vorbi cho isch.

Wo die drei nöchr a Spielfäldrand chömme mache d’Chinge ä Pause und wei usäfinde wär do chunnt cho zueluege. S’Christchindli frogt i d Rundi öb dr Samichlaus vorbi cho isch. «Jo klar isch är do gsi», tönts us allne Ecke. «Är het alles vo eus wölle wüsse, wie’s Spiel funktioniert, wär zämme spilt und weli Regle dass es git», brichtet dr einti Bueb.

Denn verzellt es Meitli witr: «Nachdäm dr Samichlaus eus ä Momänt zuegluegt het, het är gfrogt öb är cha Schidsrichter si. Är heig do ä Trillerpfiffe drbi und würd das gärn mache.» Alli Chinge hei das ä tolli Idee gfunge. «Äs isch e super spannende Match gsi», brichtet dr einti Bueb. «Wo dr Match scho fascht entschide gsi isch, het s’Meitli vo dr Mannschaft, wo hinge dri gsi isch, ä rise Schuss ufs Goal gmacht», verzellt dr Bueb witer. «I bi dr Goali gsi», seit e andere witr.

«I ha dr Ball ghabe, bi aber leider hinger dr Linie glandet. Dr Samichlaus het das nit gseh und het kei Goal pfiffe. I ha das aber nit fair gfunge und bis em Samichlaus go säge.» Dr Goali-Bueb beschribt witr wie dr alti Maa bis hinger d’Ohre gstrahlt und glücklich gsi isch, nachdäm dr Goalie-Bueb ihm d’Wohret gseit het. Denn het är sich verabschidet und gseit «nächschts Ziel – Honolulu».

«Christchindli – du muesch gar nit froge», seit dr Ben. Do druf beschribt dr Gian witr: «Mir wüsses – dr Samichlaus het sich gfreut, dass dr Bueb ehrlich gsi isch». S’Chrischtchindli cha stolzer nit si: «Sensationell, packet das i euchers Rucksäckli. Mir gö witr uf d’Insle Ohahu in Hawaii»

Nordamerika

Jetz goht’s witr mit emene chline Propällerflugzüg. Dr Papi vom Meitli wo’s Goal gschosse het, isch Pilot und nimmt se mit. «Puhh, das isch e holprige Flug gsi. Mir isch e chli drümmlig», meint s’Chrischtchindli nach däm si in Honolulu glandet si. Dr Gian und dr Ben finde das luschtig. Si hei dr Flug super gfunge.

Ä Meitli und e Bueb chömme uf se zue und begriesse se mit: «Aloha! Schön bsuechet dir eus uf Hawaii». «Aloha!» griesse alli drei zämme zrugg. «Heit dir ä alte Maa mitemene wisse Bart gseh?» frogt dr Gian. «Meinsch du dr Samichlaus?» frogt s’Meitli zrugg. «Dä isch bi eus unge am Strand. Chömmet mit!» seit dr Bueb, winkt richtig Meer und springt vorus.

Wo alli zämme am Strand achöme, finge si dr Samichlaus mit emene rote Badeazug i dr Hängematte am schnarchle. S’Meitli flüschteret: «Pssst, är macht grad sis Mittagsschlöfli». Si schliche sich alli zämme ganz liislig a Samichlaus ane und beobachte wie si grosse Buuch vom schnarchle ufe und abe goht.

Dr Ben schnappt sich e Vogelfädere wo am Bode ligt und chützelet dr Samichlaus a dr Nase. Plötzlich foht dr Samichlaus ganz lut ofo lache und sperrt d’Auge wit uf. «Das isch aber schön sit dir do. Dir glaubet gar nit wo i überall gsi bi und was i alles schöns gseh ha», vrzellt dr Samichlaus. «Mir wüsse einiges. Mir si dir nämlich um die ganzi Wält nochegreist», antwortet dr Gian. Dr Ben und dr Gian verzelle nachenanger wo si überall gsi si und was si usegfunge hei und em Samichlaus e sone Freud gmacht het.

Dr Samichlaus lost bis am Schluss gspannt zue. Denn seit är: «Öbbis fehlt euch no und das isch was i do in Hawaii gfunge ha. I ha am Haafe gholfe schaffe, ha mit de Chinge am Strand gspilt, bi i minere Hängematte gläge, ha de ältere Lüt gholfe und bi go surfe. I bi eifach nume glücklich und ha Freud am Läbe.» Mittlerwile hei sich no vill me Ching ume Samichlaus versammlet. Alli strahle und lose em Samichlaus zue. Dr Rucksack mit de guete Eigeschafte isch scho fascht voll. Dr Ben und dr Gian packe grad d’Läbensfreud i Rucksack i. Do flüschteret s’Chrischtchindli: «I bi stolz uf euch. Das heit dir super gmacht!»

Widr dähei

Die drei blibe no e Daag in Hawaii und gniesses Läbe zämme mit em Samichlaus. Nachemene Zwüschestop in Afrika fahre si mit dr Vespa und emene volle Rucksack mit Erfahrige hei.

Dähei acho verabschidet sich s’Christchindli vom Ben und em Gian, wells sich jetz uf d’Wienacht muess vorbereite. Die bede Buebe setze sich i dr Stube vor’s Cheminee und packe ihre Rucksack us. Zämme luege si all die guete Eigeschafte nomol a wo dr Samichlaus entdeckt het:

1. Mir gö friedlich mit enanger um
2. Mir liebe und schätze eusi Familie und Fründe
3. Mir teile und sorge eus um eusi Mitmensche
4. Mir verfolge eusi Träum und Ziel im Läbe
5. Mir si fair und ehrlich mitenanger
6. Mir hei Freud am Läbe und dänke as Guetä

Dr Gian und dr Ben schätze sehr was si dank em Samichlaus und de Mensche überall uf dr Wält glehrt hei. Si freue sich scho uf nächscht Johr, wenn dr Samichlaus widr hei chunnt. Aber jetz cha Wienachte cho.